الدجة

27-08-2010

خلوني اسْج في حالي ومـع حالـي

ماوالله ارتاح لين اسـج هاالسجّـه

آسج لي سجةً تبري غثـاء بالـي

لاجاتني صرت مدري وين متوجّـه

بس المُهم ابتعد عن شر غربالـي

والعالم اللي سوالفها علـى الدجّـه

ناسٍ تجيب الهموم وتنبش السالـي

اعلومهم عن طريق الحق معوجّـه

تضحك بوجهً بشوش وقلب محتالي

على النمايم وحش النـاس ملتجّـه

البُعد عنهم هنـآي وقمـة آمالـي

لوكان ممشاي مع دربٍ خـلاً فجّـه

ارتاح وانثر همومي في خلاً خالـي

واعلْم الدرب كيف اقدامي اتسْجّـه

واعْلم الكيـف لاسوّيـت فنجالـي

اضلوع صدري على طاريه منفجّـه

واعلْـم الليـل لاغنّيـت مـوالـي

بإن الهواجيس وسط الخافق اتخجّه

واعلْم الغيَـم مايحْصـل ويجَرالـي

احلام عمري سحايبها غدْت عجّـه

مابين حلمٍ قديـم وحلمـي التالـي

ماعاد ياحلمي الوردي بقـا حجّـه

ضاقت مساحات دربي والآمل طالي

يارب صدري من هموم الزمن نَجّه

نّور ضميري بذكرك وانت ملجا لي

ذكرك هْدوّي ليا حسيـت بالضجّـه

وعطني على نيتي في وجه عذالـي

اللي على غيبتي تلقـا لهـم لجّـه

ماهو/ بهمي وانا ماشي على فالـي

مقصودي الطيب لو سجّيت لي سجّه