يا حمامـه كفـي الله لا يجـزاك خيـر
من صلاة الصبح وانتي تجريـن النيـاح
كان من جور المحبه غدا شـرك شريـر
والله اني ذايـق ٍقبلـك السـم الذحـاح
وكان لوعاتك من الوقت ومفارق عشيـر
والله ان قلبي من فراق خله ما استـراح
وكان مفجوعه على فقد عـشٍ مستديـر
والله اني فاقـد شـوف نجـدٍ والفيـاح
من سمعتك يا حمامه وانا ما اقول غيـر
لى متى هذا الشقى؟؟ واردف الونه صياح
ما عليك خلاف عنـدك جناحيـن تطيـر
مير انا وشلون بانزع وانا ما لي جنـاح
مالي الا اسوق قلبي مع الغربي عصيـر
واسهر عيوني لامن شعـاع البـرق لاح
اتذكر واتوجـد علـى مـا فـات ميـر
ما ورا زود التوجـاد والذكـرى صـلاح
قبلنا شالح توجد علـى أخـوه الصغيـر
راح أخوه وعقب ما راح ذيب الخيل راح
واتوجد وجد من صـار شـره مستطيـر
وجد سعدون العواجي على طيور الفـلاح
كل ليل وعبرتي تلتقـي عقـب الأخيـر
تبتلينـي دمعـة العيـن لحـد الصبـاح
والبلا لا صاح قلبي ورا الضلع القصيـر
عوية الذيب المذير مع الحـزم البـراح
لا بغيت ادله من الهم واسـلا واستخيـر
حدني من حده القـوم بزنـود السـلاح
من بعد نجد العذية وانـا مانـي بخيـر
التفت لا اقفيت عنهـا تلفـات الطيـاح
واتثاقل خطوة الرجـل واقدامـي تحيـر
وكن صدري باجداته زواريـق الرمـاح
يوم اجيها مثـل ورد الضوامـي للغديـر
اتعجـل بالمجـي واتباطـا بالـمـراح
دبرة الله مجري الفلـك بالبحـر الغزيـر
جاري حكمه علينا مثل مجـرى الريـاح
واتعبتنـي حاجـةٍ وردتنـي كـل بيـر
ارتوي هماج والنـاس يـروون القـراح
واحدٍ حظه يشيله علـى شـداد البعيـر
واحد ٍحظه لا شاله تكرسـع ثـم طـاح
من ثلاث سنين وانـا اتحـرى للبشيـر
والبشير ابطا وانا سدي من البعـد بـاح
يابشير الخير عجل عسى دربـك سفيـر
لاتخلي للسهـر جفـن عينـي مستبـاح
كل يوم اقول بكـره يجـي منـك نذيـر
وانقضت الايام والحين ماصـار اللقـاح
ماتوَرد جمـة البيـر بسلـوك الحريـر
ولا اطلق المسجون هرج التعلل والمزاح
مالقينا بالزمـن كـود مايلقـى الفقيـر
طامع ٍ بالمـال والمـال بيديـن شحـاح
يدري الله والعرب مادروا باللـي يصيـر
مير نوحي ياحمامـه واجاذبـك النيـاح